Xhinët dhe njerëzit i kam krijuar vetëm që të Më adhurojnë. [Edh-Dharijat 51:56]

11.Është mirë që njerëzit të duan!

Imam Muhammed bin Hiban el-Busti 
Raudatul-‘Ukala ue Nuz’hetul-Fudala
Përktheu: Valdet Gashi
www.perlatmuslimane.com

1 – I mençuri është i detyruar që të sillet mirë me njerëzit, të jetë edukatës i mirë dhe të njëjtën kohë duhet të shmanget nga edukata e keqe. Njeriu duhet të jetë i tillë sepse edukata e mirë i fshinë mëkatet ashtu siç dielli e shkrin akullin. Ndërsa edukata e keqe i prish veprat ashtu siç uthulla e prish mjaltin. Mund të ndodhë që njeriu të ketë edukatë shumë të mirë por në anën tjetër ka ndonjë sjellje të keqe. Dhe mu kjo e fundit mund të fshijë dhe shkatërroj të gjithë edukatën e mirë që ai posedon!

2 – Ibn AbbasiradijAllahu anhu- ka thënë:

“Lidhjet farefisnore mund të ndërpriten dhe njeriu mundet të bëhet mosmirënjohës ndaj të mirave që ia bëjnë. Por nuk kam parë asgjë më me vlerë sesa lidhja e zemrave me njëra-tjetrën.”

3 – Fudejl bin Ijad ka thënë:

“Nëse shoqërohesh me dikë atëherë shoqërohu me atë i cili ka edukatë të mirë sepse shoqëruesi i tillë nuk thërret në diçka tjetër përveç në të mirë dhe gjithmonë gjen rehatinë tek ai. Ndërsa mos u shoqëro me atë të cilin ka edukatë të keqe sepse ai thërret vetëm në të keqe dhe shoqërimi me të është mundim. Më parë do shoqërohesha me një mëkatar i cili ka edukatë të mirë sesa me një të ditur i cili ka edukatë të keqe! Nëse mëkatari ka edukatë të mirë, ai jeton i udhëhequr nga mendja dhe intelekti i tij. Ai është “i lehtë” për njerëzit andaj njerëzit e duan atë. Por nëse i devotshmi ka edukatë të keqe njerëzit e konsiderojnë atë të bezdisshëm dhe prandaj e urrejnë atë.”

4 – Hammad bin Selemeh ka thënë:

“Agjërimi në kopsht është shtirje.” (Do të thotë të agjërosh agjërim nafile ndërsa je duke shëtitur me shokët në mesin e kopshteve që kanë fruta që njeriu rrallë mund t’i gjej. Personi që agjëron në këtë situatë vetëm shtiret).

5 – Edukata e mirë të bën të dashur tek njerëzit ndërsa edukata e keqe të bën të urryer tek njerëzit! Ai që ka edukatë të mirë e mbron nderin e vet ndërsa ai që ka edukatë të keqe e prish nderin e vet.

6 – Ez-Zuhrij ka thënë:

“A ka ndonjë dobi nga personi që ka edukatë të keqe?!”

7 – Mejmun bin Mehran ka thënë:

“Të fitosh dashurinë e njerëzve është gjysma e mençurisë. Të bësh pyetje në mënyrë të mirë është gjysma e dijes. Të jetosh thjesht do të thotë që të duhet të punosh vetëm gjysmën e kohës që zakonisht e punon.”

8 – Që të jesh në nevojë për njerëzit dhe që ata të duan ty është më mirë sesa të mos kesh nevojë për ta ndërsa ata të urrejnë. Ajo që i pengon ata që të duan është edukata e keqe. Ai që ka edukatë të keqe e lodh familjen e tij, fqinjët e tij dhe i rëndon vëllezërit e tij. Prandaj ata vetëm duan ta heqin qafe dhe luten që ai të vdes sa më parë.

9 – Njerëzit e perceptojnë një person si të bezdisshëm për shkak të dy arsyeve:

E para: Sepse vepron atë që Allahu e ka ndaluar. Kushdo që i tejkalon kufijtë e Allahut, Allahu e urren, atë që e urren Allahu, e urrejnë engjëjt, pastaj e urrejnë banorët e tokës, pastaj nuk mund të gjesh pothuajse askënd që nuk e konsideron të bezdisshëm dhe që nuk e urren atë!

Së dyti: Bërja e veprave që njerëzit i urrejnë. Nëse ai është kështu atëherë ata kanë çdo të drejtë ta konsiderojnë të bezdisshëm!

10 – Ebu Mishari ka treguar se Hisham bin Jahja i ka thënë atij: “Në unazën e të atit tënd – Ebu Ebi Misharit – ishin të shkruar inicialet e fjalës:

“Ti je i bezdisshëm! Ik nga këtu!”

Andaj çdo herë kur një person ulej me të dhe ai e konsideronte atë të bezdisshëm, ia kthente unazën atij dhe i thoshte: “Lexo çfarë shkruan në unazë!” Kur ai e lexonte largohej menjëherë nga aty.”

11 – Makhlad Ebu Ebil-‘Asim  ka thënë:

“Kur e urrej një njeri që është afër meje e urrej edhe anën e trupit tim që është më afër tij!”

12 – Ebu Bekr el-Merudhij ka thënë:

“E kam pyetur Ahmed bin Hanbel në lidhje me njerëzit e bezdisshëm.”

Ai tha: “E pyeta Bishr el-Hafi rreth tyre dhe ai tha: “Është mjerim t’i shikosh ata.”

E pyeta Ahmedin: “Kush janë njerëzit e bezdisshëm?”

Ai tha: “Pasuesit e bidateve.”

13 – Atë që përmendi imam Ahmed bin Hanbel është mënyra specifike për t’i konsideruar njerëzit si të bezdisshëm. Në qoftë se ata e dinin se një person ia ka kthyer shpinën sunnetit, ata e urrenin atë për shkak të bidatit të tij. Kurse sa i përket njerëzve të thjeshtë dhe aspektit të përgjithshëm, ata i urrenin ata në varësi të karaktereve (dhe mëkateve) të tyre të këqija, dhe i donin ata në varësi të karaktereve (dhe veprave) të tyre të mira.

14 – Ebu Usameh ka thënë:

“Ma sjell dikë që është i lehtë për zemrën, ndërsa të bezdisshmit mbaj larg meje. Të bezdisshmit mbaj larg meje.”

15 – Ibn Sirin ka thënë:

“E kam dëgjuar një beduin duke thënë: “U alivanosa në moment kur pash një person të bezdisshëm”.”

16 – Ibrahim bin Bukejr ka thënë:

“Kur Ebu Hurejrën e bezdiste shoqërimi i dikujt, thoshte:

“O Allah! Na fal neve dhe atë, dhe na mbroj nga gjendja në të cilën është ai!”

17 – I mençuri është i obliguar që në asnjë mënyrë të mos ketë ndonjë tipar që i bën njerëzit ta konsiderojnë të bezdisshëm. Por në vend të kësaj duhet të ketë tipare që i bën njerëzit ta duan atë.

18 – Prej faktorëve që kontribuojnë më së shumti që njerëzit ta duan një person është të ndihmuarit e njerëzve aq sa ke mundësi dhe t’i ruash ata nga ajo që mund të dëmtohen. Ndërsa ata të cilët nuk kanë para kur t’i takojnë njerëzit le t’u buzëqeshin atyre ngase kjo zë vendin e ndihmës ndaj tyre.

19 – Harun bin Abdil-Khalik el-Mazinij ka treguar se Ibn-ul-Mubarak u pyet në lidhje me edukatën e mirë.

Ai tha: “Buzëqeshja dhe shërbimet/ndihma (që ia bën të tjerëve).”

20 – Muxhahidi ka thënë:

“Nëse muslimani e takon vëllain e tij, ia shtrëngon dorën atij dhe i buzëqesh atij, i bien mëkatet atik ashtu siç bie një bistak hurme nga palma.”

Pastaj një person tha: O Ebul-Haxhaxh, kjo është një vepër fare e lehtë!”

Kurse Muxhahidi ia ktheu:

هُوَ الَّذِيَ أَيَّدَكَ بِنَصْرِهِ وَبِالْمُؤْمِنِينَ وَأَلَّفَ بَيْنَ قُلُوبِهِمْ لَوْ أَنفَقْتَ مَا فِي الأَرْضِ جَمِيعاً مَّا أَلَّفَتْ بَيْنَ قُلُوبِهِمْ

“Ai të ka forcuar me ndihmën e Tij dhe me besimtarët duke i bashkuar zemrat e tyre. Sikur të shpenzoje tërë pasurinë që gjendet në tokë nuk do të mund t’i bashkoje zemrat e tyre.” El-Enfal, 8:62-63

A është kjo e lehtë?!”

Shpërndaje: