Xhinët dhe njerëzit i kam krijuar vetëm që të Më adhurojnë. [Edh-Dharijat 51:56]

4.Dhikri (përmendja) e Allahut në mëngjes dhe mbrëmje

Shejkhul Islam Ibnu Tejmijeh (v. 728)
Sahihul-Kelimit-Tajjib
Verifikoi dhe korrigjoi: Imam Muhamed Nasirudin el-Albani 
Përktheu: Valdet Gashi 
www.perlatmuslimane.com

Allahu (te ala) ka thënë:

يَا أَيُّهَا الَّذِينَ آمَنُوا اذْكُرُوا اللَّهَ ذِكْرًا كَثِيرًا وَسَبِّحُوهُ بُكْرَةً وَأَصِيلًا

“O besimtarë! Përmendeni shpesh Allahun dhe lavdërojeni Atë në mëngjes dhe në mbrëmje!” 33:41-42

Mbrëmje është për qëllim koha ndërmjet Ikindisë dhe Akshamit. Allahu (te ala) ka thënë:

وَاذْكُر رَّبَّكَ فِي نَفْسِكَ تَضَرُّعاً وَخِيفَةً وَدُونَ الْجَهْرِ مِنَ الْقَوْلِ بِالْغُدُوِّ وَالآصَالِ وَلاَ تَكُن مِّنَ الْغَافِلِينَ

“Përmende Zotin tënd me vete, i përulur dhe me frikë – jo me zë të lartë, në mëngjes dhe mbrëmje, dhe mos u bëj nga ata që nuk i kushtojnë vëmendje!” 7:205

وَسَبِّحْ بِحَمْدِ رَبِّكَ بِالْعَشِيِّ وَالْإِبْكَارِ

“… dhe lartësoje Zotin tënd me lavdërim, në mbrëmje dhe mëngjes!” 40:55

وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ الْغُرُوبِ

“… lartësoje Zotin tënd e lavdëroje Atë para lindjes së diellit dhe para perëndimit.” 50:39

وَلاَ تَطْرُدِ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ

“Mos i dëbo ata që i luten Zotit të vet në mëngjes e mbrëmje, duke e dëshiruar Fytyrën e Tij!” 6:52

فَخَرَجَ عَلَى قَوْمِهِ مِنَ الْمِحْرَابِ فَأَوْحَى إِلَيْهِمْ أَن سَبِّحُوا بُكْرَةً وَعَشِيًّا

“Ai doli nga faltorja para popullit të vet dhe u bëri me shenjë atyre të lavdëronin Allahun në mëngjes dhe në mbrëmje!” 19:11

وَمِنَ اللَّيْلِ فَسَبِّحْهُ وَإِدْبَارَ النُّجُومِ

“… edhe gjatë natës lavdëroje Atë, si dhe pas perëndimit të yjeve!” 52:49

فَسُبْحَانَ اللَّهِ حِينَ تُمْسُونَ وَحِينَ تُصْبِحُونَ

“Prandaj lavdërojeni Allahun, kur bie muzgu dhe, kur gdhin drita!” 30:17  

وَأَقِمِ الصَّلاَةَ طَرَفَيِ النَّهَارِ وَزُلَفًا مِّنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ

“Fale namazin në mëngjes e mbrëmje dhe në një kohë të natës, sepse veprat e mira i shlyejnë veprat e këqija.” 11:114

16 – Ebu Hurejra (radijAllahu anhu) tregoi se profeti ka thënë:

من قال حين يُصبح وحين يُمسي: سبحان الله وبحمده مائة مرة؛ لم يأْتِ أحد يوم القيامة بأفضلَ مما جاء به، إلا أحد قال مثل ما قال، أو زاد عليه

“Ai që arrin mëngjesin dhe mbrëmjen dhe thotë njëqind herë: “I Pastër nga të metat është Allahu dhe Atij i takon lavdërimi”, askush nuk do të vijë në Ditën e Kiametit me diçka më të mirë sesa ky, përveç atij i cili ka thënë aq sa ky apo më tepër.”

Transmeton Muslimi [1].

17 – Ibn Mesudi (radijAllahu anhu) ka thënë:

Profeti ﷺ, kur arrinte mbrëmjen, e kishte zakon të thoshte:

أَمْسَيْـنا وَأَمْسـى المـلكُ لله وَالحَمدُ لله ، لا إلهَ إلاّ اللّهُ وَحدَهُ لا شَريكَ لهُ، لهُ المُـلكُ ولهُ الحَمْـد، وهُوَ على كلّ شَيءٍ قدير ، رَبِّ أسْـأَلُـكَ خَـيرَ ما في هـذهِ اللَّـيْلَةِ وَخَـيرَ ما بَعْـدَهـا ، وَأَعـوذُ بِكَ مِنْ شَـرِّ هـذهِ اللَّـيْلةِ وَشَرِّ ما بَعْـدَهـا ، رَبِّ أَعـوذُبِكَ مِنَ الْكَسَـلِ وَسـوءِ الْكِـبَر ، رَبِّ أَعـوذُ بِكَ مِنْ عَـذابٍ في النّـارِ وَعَـذابٍ في القَـبْر

“E arritëm mbrëmjen, i gjithë sundimi i takon Allahut. Falënderimiet dhe Lavdërimet janë për Allahun, nuk ka të adhuruar me të drejtë përveç Allahut të Vetëm dhe të Pashoq, Atij i takon sundimi dhe falënderimi; Ai është i Plotfuqishëm mbi çdo gjë. O Zot, unë kërkoj nga Ti mirësinë e kësaj nate dhe mirësinë e netëve që vijnë pas saj dhe prej Teje kërkoj mbrojtjen nga e liga e kësaj nate dhe e netëve të tjera pas saj! O Zot, unë kërkoj nga Ti të më mbrosh nga përtacia dhe pleqëria e keqe! O Zot! Më mbro nga dënimi i Zjarrit dhe nga dënimi i varrit!”

Ndërsa, kur zgjohej e kishte zakon të thoshte:

أصبحنا وأصبح الملك لله

“E arritëm mëngjesin, i gjithë sundimi i takon Allahut…” Muslimi [2].

18 – Abdullah bin Khubejb ka thënë:

خرجنا في ليلة مطيرة وظلمة شديدة نطلب رسول الله صلى الله عليه وسلم يصلي لنا ، قال : فأدركته فقال : قل فلم أقل شيئا ثم قال : قل فلم أقل شيئا قال : قل فقلت ما أقول ، قال:قل هو الله أحد والمعوذتين حين تمسي وتصبح ثلاث مرات تكفيك من كل شيء

“Ne dolëm në një natë shumë të errët me shi, dolëm dhe po kërkonim profetin  që të falej me ne. Kur e gjetëm atë, ai tha: “Thuaj!” Unë nuk thashë asgjë. Ai tha: “Thuaj!” Unë nuk thashë asgjë. Ai tha: “Thuaj!” Unë thashë: “O i Dërguari i Allahut! Çfarë të them?” Ai tha: “Lexo tri herë:

“Thuaj: Ai është Allahu – i Vetmi…”(el-Ikhlas) dhe suret el-Felek dhe en-Nes, kur ta arrish mbrëmjen dhe mëngjesin. Kjo do të mjaftojë (për mbrojtje) kundër çdo gjëje.”

Transmeton Ebu Daudi, Nesai dhe Tirmidhi cili tha: “Hadithi është i mirë dhe autentik.”

Kjo është e saktë. Zinxhiri i hadithit është i mirë.

19 – Ebu Hurejra (radijAllahu anhu) tregoi se profeti i mësonte sahabët e tij, duke u thënë: 

إِذَا أَصْبَحَ أَحَدُكُمْ فلْيَقُلْ اللهُمَّ بِكَ أَصْبَحْنَا وَبِكَ أَمْسَيْنَا وَبِكَ نَحْيى وَبِكَ نَمُوتُ وَإِلَيْكَ النُّشُورُ وَإِذَا أَمْسى فَلْيَقُلْ اللهم بك أَمْسَيْنَا وَبِكَ أَصْبَحْنَا وَبِكَ نَحْيى وَبِكَ نَمُوتُ وإِلَيْكَ الْمَصِي

“Kur ndonjëri prej jush arrin mëngjesin, le të thotë: “O Allah! Me emrin tënd e arritëm mëngjesin dhe me emrin tënd arrijmë mbrëmjen. Me emrin Tënd jetojmë dhe me emrin Tënd vdesim dhe te Ti është kthimi.”

Ndërsa në mbrëmje thuaj: “O Allah! Me emrin tënd e arritëm mbrëmjen dhe me emrin tënd arrijmë mëngjesin. Me emrin Tënd jetojmë dhe me emrin Tënd vdesim dhe tek Ti është kthimi.”

Transmeton Tirmidhi cili tha: “Hadithi është i mirë dhe autentik.”

20 – Shedad bin Aus (radijAllahu anhu) tregoi se profeti ka thënë:

سَيِّدُ الاسْتِغْفَار اللهُمَّ أَنْتَ رَبِّي لا إِلهَ إِلاَّ أَنْتَ خَلَقْتَنِي وَأَنَا عَبْدُكَ وَأَنا عَلَى عَهْدِكَ وَوَعْدِكَ مَا اسْتَطَعْتُ أَعُوذُ بِكَ مِنْ شَرِّ مَا صَنَعْتُ أَبوءُ لَكَ بِنِعْمَتِك عَلَيَّ وأَبوءُ بِذَنْبِي فاغْفِرْ لي فإِنَّه لاَ يغْفِرُ الذُّنُوبَ إِلاَّ أَنْتَ وارْحَمْنِي فَإِنَّكَ أَنْتَ الْغَفُورُ الرَّحيمُ. من قالها حين يمسي فمات من ليلته دخل الجنة، ومن قالها حين يصبح فمات من يومه دخل الجنة

 “Zotëria i lutjeve për kërkimin e faljes është: “O Allah! Ti je Zoti im. Nuk ka të adhuruar me të drejtë përveç Teje. Ti më ke krijuar dhe unë jam robi Yt. Do të qëndroj besnik ndaj premtimit dhe zotimit që të kam dhënë sa të kem mundësi [3]. Kërkoj mbrojtjen tënde nga e keqja që kam vepruar. Unë pranoj se më ke begatuar me dhunti, i pranoj mëkatet e mia, andaj më fal mua, ngase nuk i fal mëkatet askush tjetër përveç Teje.”

Kushdo e thotë këtë në mbrëmje, duke qenë i bindur në të dhe vdes gjatë kësaj nate, ai do të hyjë në Xhenet. Kushdo që e lexon atë në mëngjes dhe vdes gjatë asaj dite, do të hyjë në xhenet.”

Transmeton Bukhari.

21 – Ebu Bekr es-Sidik (radijAllahu anhu) ka treguar se profeti ka thënë:

قل اللهُمَّ عَالِمَ الْغَيْبِ والشَّهَادَةِ فَاطِرَ السَّمواتِ والأَرْضِ رَبَّ كُلِّ شيءٍ وَمَلِيكَهُ أَشْهَدُ أَنَّ لا إِلهَ إِلاَّ أَنْتَ أَعُوذُ بِكَ من شَرِّ نَفْسِي وَشَرِّ الشَّيْطَانِ وَشَرَكِهِ وفي رواية وَأَنْ أَقْتَرِفَ عَلى نَفْسي سُوءاً أَو أَجُرَّهُ على مسلم. قُلْهُ إِذَا أَصْبَحْتَ وَإِذَا أَمْسَيْتَ وَإِذَا أَخَذْتَ مَضْجَعَكَ

“Thuaj: “O Allah! Ti ke dituri për të fshehtën dhe të dukshmen. Ti je Krijuesi i qiejve dhe i tokës, Zot i gjithçkaje dhe Sunduesi i çdo gjëje. Dëshmoj se nuk ka të adhuruar me të drejtë përveç Teje. Kërkoj strehim te Ti nga e keqja e vetes sime, nga e keqja e shejtanit dhe nga ajo me të cilën ai thërret në shirk!” Në një transmetim tjetër shtohet: “Dhe kërkoj të më mbrosh që as vetvetes e as ndonjë muslimani të mos i bëj keq.” Thuaje këtë kur të zgjohesh në mëngjes, kur të vijë mbrëmja dhe kur të biesh në gjumë.”

Transmeton Tirmidhi, i cili tha: “Hadithi është i mirë dhe autentik.”

Kjo është e saktë. Transmetimi i dytë, megjithatë, nuk është i Ebu Hurejrës por i Abdullâh bin Amrit dhe transmetohet nga Bukhari në “el-Adab el-Mufred” (1204) dhe Tirmidhi i cili tha se zinxhiri i transmetimit është i mirë. Unë besoj se është autentik.

22 – Uthman bin Affan (radijAllahu anhu) tregoi se i dërguari i Allahut ka thënë:

مَا مِنْ عَبْدٍ يقول في صباح كلِّ يَوْمٍ وَمَسَاءِ كُلِّ لَيْلَةٍ بِسْمِ اللهِ الَّذِي لاَ يَضُرُّ مَعَ اسْمِهِ شَيء في الأرْضِ وَلاَ في السَّمَاءِ وَهُوَ السَّمِيعُ العَلِيمُ ثَلاَثَ مَرَّاتٍ لَمْ يَضُرُهُ شَيء

“Çdo rob i cili thotë (nga tri herë) në çdo mëngjes dhe në çdo mbrëmje: “Me emrin e Allahut, me emrin e të Cilit asgjë nuk mund të dëmtojë as në tokë e as në qiell dhe Ai dëgjon çdo gjë dhe është Gjithëdijshmi.

Ai ﷺ ka thënë kush e thotë këtë lutje tre herë në mëngjes dhe në mbrëmje, nuk i bëhet dëm asgjë.

Transmeton Tirmidhi, i cili tha: “Hadithi është i mirë dhe autentik.”

23 – Abdullah bin Umeri (radijAllahu anhu) ka thënë:

Profeti nuk i linte asnjëherë këto lutje, në mbrëmje dhe në mëngjes: 

اللهمَّ إِنيِّ أَسْأَلُكَ الْعاَفِيَةَ فيِ الدُّنْياَ و الآخِرَة ، اللهمَّ أَسْأَلٌكَ الْعَفْوَ و الْعاَفِيَةَ فيِ دِينيِ وَ دُنْياَيَ ، و أَهْليِ و ماَليِ ، اللهمَّ اسْتُرْ عَوْراَتيِ ، و آمِنْ رَوْعاَتيِ ، اللهمَّ احْفَظْنيِ مِنْ بَيْنِ يَدَيَ و مِنْ خَلْفيِ ، و عَنْ يَمِينيِ ، و عَنْ شِماَليِ ، و مِنْ فَوْقيِ ، و أَعُوذُ بِعَظَمَتِكَ أَنْ أُغْتاَلَ مِنْ تِحْتيِ

“O Allah! Kërkoj nga Ti mirëqënie në këtë botë dhe në ahiret! O Allah! Kërkoj nga Ti që të më falësh dhe të më mbrosh në fenë dhe jetën time, ma ruaj familjen dhe pasurinë time! O Allah! M’i mbulo të metat e mia dhe më jep siguri në çaste të vështira/trishtuese. O Allah! Më mbro mua nga para, mbrapa, djathtas, majtas dhe nga lartë! Unë kërkoj strehim te Ti që të mos më lëshojë toka nga poshtë.”[4] 


[1] Fraza “Nuk ka të adhuruar me të drejtë përveç Allahut” dhe dhikre të tjera të ligjësuara, nuk kufizohen në një numër specifik, nëse nuk ka argument për këtë.”

[2] V.P. Fjalët: “mbrëmje/natë”, zëvendësohen me fjalët “mëngjes/ditë” nga hadithi paraprak.

[3] D.m.th. të të besoj Ty dhe të të bindem sinqerisht.

[4] Ueki’u ka thënë: “Do të thotë nga rrëshqitja e tokës.”

Shpërndaje: