Imam Muhammed bin Abdil-Uehab (v. 1206)
Burimi: Të mësuarit Teuhidin fëmijëve, fq. 18-21
Përktheu: Valdet Gashi
Besimi ka 6 shtylla. Ato janë që të besosh në:
1 – Allahun.
2 – Engjëjt e Tij.
3 – Librat e Tij.
4 – Të dërguarit e Tij.
5 – Ditën e ringjalljes.
6 – El-Kader (përcaktimin) në të mirën dhe të keqen e tij.
Dëshmia për këtë është hadithi i vërtetë i transmetuar nga Umer bin el-Khatabi (radijAllahu anhu):
”Një ditë, kur ne ishim ulur me të dërguarin e Allahut, një njeri erdhi tek ne me rroba shumë të bardha dhe me flokë shumë të zinjë. Tek ai nuk dukeshin shenjat e udhëtimit dhe askush prej nesh nuk e njihte atë. Ai u ul pranë profetit ﷺ dhe i mbështeti gjunjët e tij me gjunjët e profetit dhe i vendosi duart e tij mbi kofshët e tij.
Ai tha: ”O Muhammed, më informo mua rreth Islamit!”
I dërguari i Allahut ﷺ tha: ”Islami është të dëshmosh se nuk meriton të adhurohet me të drejtë askush përveç Allahut dhe se Muhammedi është rob dhe i dërguari i Allahut, të falësh namazin, të japësh zekatin, të agjëroshë Ramazanin dhe të bësh haxhin në shtëpinë e shenjtë nëse ke mundësi.”
Ai tha: ”Ke thënë të vërtetën.”
Ne u befasuam sepse ai e pyeste atë dhe pastaj ia konfirmonte se ai e kishte thënë të vërtetën.
Pastaj tha: ”Më informo rreth imanit!”
I dërguari i Allahut ﷺ tha:
”Imani është të besosh në:
1 – Allahun.
2 – Engjëjt e Tij.
3 – Librat e Tij.
4 – Të dërguarit e Tij.
5 – Ditën e ringjalljes.
6 – El-Kader (përcaktimin) në të mirën dhe të keqen e tij.”
Ai tha: ”Ke thënë të vërtetën.” Më informo rreth Ihsanit!”
I dërguari i Allahut ﷺ tha: ”Ta adhurosh Allahun sikurse po e sheh Atë. Edhe pse ti nuk e sheh Atë, vërtet Ai të sheh ty.”
Ai tha: ”Më njofto rreth çastit.”
I dërguari i Allahut ﷺ tha: ”I pyeturi nuk di më shumë se pyetësi.”
Ai tha: ”Më lajmëro për shenjat e tij!”
I dërguari i Allahut ﷺ tha: ”Robëresha do të lind zonjën e saj, dhe do ti shihni barinjtë këmbëzbathur, të zhveshur dhe të varfër se si do të garojnë në ndërtimin e ndërtesave të larta.” Pastaj ai shkoi dhe unë mbeta ulur për një kohë të gjatë.
Pastaj i dërguari i Allahut ﷺ tha: ”O Umer, a e di se kush qe pyetësi?”
Unë u përgjigja: ”Allahu dhe i dërguari i Tij e dinë më së miri.”
I dërguari i Allahut ﷺ tha: ”Ai ishte Xhibrili që erdhi tek ju për t’jua mësuar fenë tuaj.” Muslimi (8)