Imam Muhamed bin Salih bin Uthejmin (v. 1421)
Sherh Sahih El-Bukhari (3/242-243)
Përktheu: Valdet Gashi
www.perlatmuslimane.com
Imam Bukhari -rahimehullah- ka thënë:
757 – Ebu Hurejra-radijAllahu anhu- rrëfeu:
”Një burrë hyri në xhami, ndërsa i dërguari ﷺ ishte ulur në xhami. Burri u fal dhe erdhi te i dërguari ﷺ, dhe e përshëndeti me selam.
Profeti ﷺ ia ktheu selamin dhe i tha: “Kthehu falu se nuk je falur!” Personi u kthye dhe u fal ashtu siç u fal herën e parë, pastaj erdhi dhe e përshëndeti me selam profetin ﷺ.
Ai ﷺ ia ktheu selamin dhe i tha: “Kthehu falu se nuk je falur!” Një gjë e tillë u përsëritë tre herë.
Burri i tha: “Pasha Atë që të ka dërguar me të vërtetën, unë nuk di më mirë se kaq, andaj më mëso!”
Profeti ﷺ i tha: ”Kur të ngrihesh për tu falur, merr abdes në mënyrë të përkryer, pastaj drejtohu kah kibla dhe thuaj: “Allahu Ekber”, pastaj lexo atë që të vjen më lehtë nga Kurani, pastaj zbrit në ruku dhe qëndro në atë pozicion derisa të qetësohesh, pastaj ngrihu në këmbë dhe qëndro ashtu derisa të qetësohesh, pastaj zbrit në sexhde dhe qëndro në atë pozicion derisa të qetësohesh, pastaj ngrihu (dhe rri ulur mes dy sexhdeve) derisa të qetësohesh në atë pozicion, pastaj vepro kështu në të gjithë namazin tënd!”
Transmeton Bukhari (6251) dhe Muslimi (397).
Sipas hadithit, ai që e ka përfunduar namazin dhe i bashkohet një grupi njerëzish, duhet t’u japë selam atyre. Profeti ﷺ ia ktheu selamin (këtij burrit në hadith).
A përjashtohen ata që janë të zënë me lexim të Kuranit, ligjërata fetare ose diçka të ngjashme?
Disa dijetarë thonë se ata janë të përjashtuar nga kjo, sidomos kur ka shumë njerëz. Nëse vijnë shumë persona dhe secili jep selam, ndërsa të pranishmit ua kthejnë selamin të gjithëve, atëherë mësimi ose leximi mund të ndërpritet. Prandaj duhet parë se cila është më e dobishmja. Nëse është më e dobishme të japësh selam, e bën këtë. Në të kundërt, thjesht ulesh pa dhënë selam.