Shejkh Sulejman er-Ruhejli
Përktheu: Valdet Gashi
www.perlatmuslimane.com
Prej obligimeve dhe të drejtave që janë reciproke ndërmjet të dy bashkëshortëve është dhe ajo e cila përfshihet në parimin Kuranor: Ruajtja e sekreteve bashkëshortore, madje edhe në rast se Allahu ka caktuar që ata të dy të ndahen nga njëri-tjetri.
I dërguari i Allahut ﷺ ka thënë:
”Njeriu me pozitën më të keqe tek Allahu në ditën e ringjalljes është burri që ka marrëdhënie me gruan e tij dhe ajo me të dhe pastaj përhap sekretet e saj.” Transmeton Muslimi.
Dhe i dërguari i Allahut ﷺ ka thënë
“Ndoshta një burrë tregon atë që bëri me gruan e tij.”
Vini re vëllezërit e mi – këtu përfshihet si ai që flet me një grup njerëzish, si ai që flet me një person të vetëm.
”Ndoshta një burrë tregon atë që bëri me gruan e tij dhe ndoshta një grua tregon atë që bëri me burrin e saj.”
Mos e bëni këtë!
”Me të vërtetë kjo është sikurse një shejtan mashkull dhe një shejtane femër që bëjnë zina në rrugë ndërsa njerëzit i shikojnë.”
Në një transmetim, nga Esma bintu Jezid radijAllahu anha, ku ajo ishte me të dërguarin e Allahut ﷺ, ndërsa burrat dhe gratë ishin ulur me të dhe i dërguari i Allahut ﷺ tha:
”Ndoshta një burrë tregon atë që bëri me gruan e tij. Ndoshta një grua tregon atë që bëri me burrin e saj.”
Njerëzit qëndruan të heshtur, kështu që unë (Esma) thashë:
”Pasha Allahun, gratë thonë kështu dhe burrat veprojnë kështu.”
Profeti ﷺ tha:
”Mos e bëni këtë sepse me të vërtetë kjo është sikurse një shejtan mashkull dhe një shejtane femër që bëjnë zina në rrugë ndërsa njerëzit i shikojnë.”
Transmetuar nga Ahmedi dhe shejkh Albani ka thënë se hadithi është hasen ose sahih.