Si do të ringjallen njerëzit Ditën e Gjykimit?

Burimi: “Komisioni i Përhershëm për Kërkime dhe Fetva”, fetvaja nr. 189\10

Anëtarë: Shejkh Abdullah el-Muni’ dhe Shejkh Abdullah bin Gudejan
Zëvendëskryetar: Shejkh Abdurrazak el-Afifi

Përktheu: Valdet Gashi

www.perlatmuslimane.com

Pyetje: “Si do të ringjallen njerëzit nga varret në Ditën e Kiametit? Kush do të ngrihet nga aty i pari?”

Përgjigja: “Allahu سبحانه و تعالى do ta rikrijojë njeriun në Ditën e Kiametit nga kocka e shpinës së tij dhe ata do të mbijnë (zhvillohen) nga toka ashtu siç bimët mbijnë nga farat e mbjella. Ata do të dalin prej varreve të tyre zbathur, lakuriq dhe të pabërë synet. Ata do të nxitojnë përpara si karkaleca ose si flutura të shpërndara dhe nuk do të humbasin rrugën për tek vendi ku do të tubohen të gjithë njerëzit. Në fakt, ata do ta dinë këtë rrugë më mirë sesa një pëllumbesh që e di rrugën e saj për në folenë e saj, ashtu sikurse ata të jenë duke garuar për ndonjë gjë të caktuar.

Toka do t’i hapet së pari Profetit tonë Muhamedit صلى الله عليه و سلم dhe ai do të ringjallet i pari. Ndërsa të parit që do t’i jepen rroba është i miku i Mëshiruesit (Ibrahimi) عليه الصلاة و السلام. Tmerri do të kaplojë njerëzimin atë ditë deri në atë pikë sa edhe Profetët do të thonë: “Vetja ime, vetja ime”. Ai që i lexon ajetet të cilat flasin për Ringjalljen, siç janë ajetet në sures el-Kamer, el-Me’arixh, el-Kari’ah , etj. Do të gjejë argumente në lidhje me ato që i cekëm, por do të ketë edhe më shumë informacion në lidhje me atë ngjarje të madhe. Nga një transmetim në Sahihun e Bukhariut dhe Muslimit thuhet se Profeti صلى الله عليه و سلم ka thënë:

كَمَا بَدَأْنَا أَوَّلَ خَلْقٍ نُعِيدُهُ وَعْداً عَلَيْنَا إِنَّا كُنَّا فَاعِلِينَ وأول من يُكسى يوم القيامة إبراهيم ، وإن أناسًا من أصحابي: إنكم محشورون حفاة عراة غرلاً ثم قرأ يؤخذ بهم ذات الشمال فأقول: أصحابي أصحابي، فيقول: إنهم لم يزالوا مرتدين على أعقابهم منذ فارقتهم، فأقول كما قال العبد الصالح : وَكُنتُ عَلَيْهِمْ شَهِيدًا مَّا دُمْتُ فِيهِمْ فَلَمَّا تَوَفَّيْتَنِي كُنتَ أَنتَ الرَّقِيبَ عَلَيْهِمْ وَأَنتَ عَلَى كُلِّ شَيْءٍ شَهِيد ، إِن تُعَذِّبْهُمْ فَإِنَّهُمْ عِبَادُكَ وَإِن تَغْفِرْ لَهُمْ فَإِنَّكَ أَنتَ الْعَزِيزُ الْحَكِيمُ

“Ju do të ringjalleni të zbathur, lakuriq dhe të pabërë synet.”Pastaj lexoi ajetin: 

“Ashtu siç e filluam krijimin e parë, do ta përsërisim atë. Ky është premtimi Ynë. Ne do ta bëjmë këtë me të vërtetë.” 1

”I pari që do të jetë i veshur në Ditën e Kiametit është Ibrahimi. Ndërsa një grup prej shokëve të mi do të tërhiqen nga ana e majtë dhe unë do të them: “Shokët e mi, shokët e mi”E do të më thuhet: “Prej kur ti je ndarë prej tyre, ata kanë qenë jobesimtarë.” E do them ashtu siç ka thënë robi i ndershëm i Zotit (Isai عليه السلام): 

“Kam qenë dëshmitar për sa kohë që kam jetuar midis tyre dhe qëkurse më more mua, vetëm Ti ishe mbikëqyrës i tyre. Ti je Dëshmitar për çdo gjë. Nëse Ti i dënon ata, robërit e Tu janë e nëse i fal ata, me të vërtetë vetëm Ti je i Plotfuqishmi dhe i Urti.” 2

Ndërsa në një hadith tjetër që gjithashtu e transmeton Bukhariu dhe Muslimi, thotë i Dërguari i Allahut صلى الله عليه و سلم :

إن الناس يصعقون يوم القيامة فأكون أول من تنشق عنه الأرض

“Njerëzit do ringjallen Ditën e Kiametit dhe unë do jem i pari të cilit do t’i hapet toka.”

Gjithashtu po tek Bukhariu dhe Muslimi transmetohet se Profeti صلى الله عليه و سلم ka thënë:

إن الناس يصعقون يوم القيامة، فأكون أول من يفيق

“Njerëzit do ringjallen Ditën e Kiametit dhe unë do jam i pari i cili do të ringjallet.”

Ju mund të merrni hollësi të mëtejshme në lidhje me hadithet e mësipërme nga libri “Komentimi i Akides et-Tahauijeh” të Imam Et-Tahauit, aty kur flitet për gjendjet e njerëzve në Ditën e Kiametit.

I gjithë suksesi është prej Allahut, salavatet dhe selamet qofshin mbi Profetin tonë familjen e tij dhe të gjithë ata që e pasojnë rrugën e tij.”

---

1 El-Enbija’ 21:104

2 El-Maideh 5:117