Alameh Salih bin Sa’d es-Suhejmi
www.perlatmuslimane.com
Pyetje: Shejkh i nderuar, si mund të dallojmë mes dijetarëve edukues (rabanijinë) dhe atyre që pretendojnë të jenë të tillë dhe që i devijojnë njerëzit me fetvatë e tyre?
Përgjigje: Në disa mënyra që po i përmbledh:
1-Ata kujdesen dhe i përmbahen Teuhidit.
2-Ata thërrasin për tek Libri i Allahut (azze ue xhel) dhe sunneti i të dërguarit të Allahut ﷺ.
3-Ata e praktikojnë këtë në veprat e tyre, e praktikojnë në veprat e tyre.
4-Janë të qëndrueshëm në kohën e fitneve (sprovave). Ata nuk ndryshojnë në varësi të situatave, ditëve, kohërave, përkundrazi, qëndrimi i tyre është gjithmonë i njëjtë, duke i gjykuar çështjet në bazë të Librit të Allahut dhe sunnetit të profetit ﷺ sipas kuptimit të selefëve të devotshëm.
5-Gjithashtu nga shenjat e tyre është se ata janë të qartë dhe nuk fshihen. Ata nuk mblidhen në shkretëtira dhe në vende të fshehta sepse feja është e qartë, nuk ka asgjë të fshehtë në të, siç thotë Sufjan ibn Ujejneh, Allahu i Lartësuar e mëshiroftë atë:
”Nëse shihni njerëz që kur flasin për çështjet e tyre fetare, veçohen në fshehtësi nga shoqëria, dije se ata janë në themelimin e një devijimi.” 1
6-Gjithashtu nga shenjat e tyre është se qëllimi i tyre nuk është të thërrasin tek vetet e tyre, qëllimi i tyre nuk është të thërrasin tek vetet e tyre (siç thuhet në hadith):
’’Nëse caktohet në pararojë, ai është plotësisht i kënaqur me postin e tij të mbrojtjes, dhe nëse caktohet në prapavijë, ai e pranon postin e tij me kënaqësi.” 2
7-Gjithashtu nga shenjat e tyre është se ata ua duan të mirën vëllezërve njësoj si për veten e tyre. Qëllimi i tyre është udhëzimi i krijesave për tek e mira:
“Që Allahu të udhëzojë një person të vetëm përmes teje, është më e mirë për ty sesa devetë e kuqe.” 3
Këto janë disa nga shenjat dalluese të dijetarëve edukues të cilëve duhet t’u përmbahemi.
1 Kjo fjalë është e njohur si thënie e Umer ibn Abdul-Aziz (Allahu e mëshiroftë). Shejkh Abdu-Selam ibn Berxhes (Allahu e mëshiroftë) në risalen e tij ’’ الأمر بلزوم جماعة المسلمين وامامهم’’ fq. 84 thotë: ”Ky ether nga Umer ibn Abdul Aziz është transmetuar nga imam Ahmedi në ’’Zuhd’’ fq. 48, nga imam Darimi në sunenin e tij 1/343-344, nga imam Lalekai në ’’Sherh Usulu Itikad Ehli Sunneh’’ 1/135, dhe nga Ibn Abdul-Berri në ’’Xhamiu bejan ue Fadlihi’’ 2/932. ”
2 Bukhari (2887).
3 Bukhari (3701) dhe Muslimi (2406).