“Nuk i kam krijuar xhinët dhe njerëzit veçse që të më adhurojnë Mua.” [Edh-Dharijat 51:56]

Detyra më e madhe e të dërguarve & i dërguari i parë dhe i fundit

Imam Muhammed bin Salih bin Uthejmin (v. 1421)

Burimi: “Sherh Thalathetil-Usul” 112

Përktheu: Valdet Gashi

www.perlatmuslimane.com

Gjëja më e madhe në të cilën thirrën të gjithë të dërguarit e Allahut, nga i pari prej tyre Nuhu (alejhis-selam) deri tek i fundit Muhammedi (salAllahu alejhi ue selem), ishte Teuhidi (Njësimi i Allahut). Allahu (Te’ala) ka thënë:

وَلَقَدْ بَعَثْنَا فِي كُلِّ أُمَّةٍ رَّسُولاً أَنِ اعْبُدُواْ اللّهَ وَاجْتَنِبُواْ الطَّاغُوتَ

“Ne dërguam në çdo popull të dërguar që t’u thonë: ”Adhuroni vetëm Allahun, e largojuni tagutit (shejtanëve ose çdo gjëje tjetër që adhurohet pos Allahut)” 1

Dhe thotë Allahu:

وَمَا أَرْسَلْنَا مِن قَبْلِكَ مِن رَّسُولٍ إِلَّا نُوحِي إِلَيْهِ أَنَّهُ لَا إِلَهَ إِلَّا أَنَا فَاعْبُدُونِ

”Ne nuk dërguam asnjë të dërguar para teje, e të mos i kemi shpallur atij se: “Nuk meriton të adhurohet me të drejtë askush përveç Meje, andaj më adhuroni (vetëm) Mua!”  2

I pari prej të dërguarve ishte Nuhu (alejhiss-selam) dhe i fundit ishte Muhammedi (salAllahu alejhi ue selem). Dëshmia se, i pari prej të dërguarve ishte Nuhu (alejhis-selem) janë fjalët e Allahut (Te’ala):

إِنَّا أَوْحَيْنَا إِلَيْكَ كَمَا أَوْحَيْنَا إِلَى نُوحٍ وَالنَّبِيِّينَ مِن بَعْدِهِ

“Ne të frymëzuam ty (o Muhammed) me shpallje, ashtu siç frymëzuam me shpallje Nuhun dhe profetët pas tij.” 3

Shpjegimi:

Këtu Shejkhul-Islam Muhammed bin Abdil-Vehab Allahu e mëshiroftë sqaroi se i dërguari i parë ishte Nuhu (alejhis-salatu ues-selam). Këtë ai dëshmon me fjalët e Allahut (Te’ala):

إِنَّا أَوْحَيْنَا إِلَيْكَ كَمَا أَوْحَيْنَا إِلَى نُوحٍ وَالنَّبِيِّينَ مِن بَعْدِهِ

“Ne të frymëzuam ty (o Muhammed) me shpallje, ashtu siç frymëzuam me shpallje Nuhun dhe profetët pas tij.” 4

Është konfirmuar në hadithin autentik në lidhje me ndërmjetësimin:

اذهبوا الى نوح فهو أول نبي فيذهبون إلى نوح فيقولون له

“Shkoni tek Nuhu, sepse ai është i dërguari i parë. Njerëzit do të shkojnë tek Nuhu dhe i thonë atij…” 5

Nuhu (alejhis-selam) pra ishte i dërguari i parë. Me anë të kësaj, na bëhet me dije gabimi në të cilin kanë rënë disa historianë kur ata thanë se Idrisi (alejhis-salatu ues-selam) ishte para Nuhut (alejhis-selam). Mirëpo është më se e qartë se Idrisi (alejhis-selam) ishte një nga profetët izraelitë.

I dërguari i fundit ishte Muhamedi (salAllahu alejhi ue selem). Ai (Te’ala) ka thënë:

مَّا كَانَ مُحَمَّدٌ أَبَا أَحَدٍ مِّن رِّجَالِكُمْ وَلَكِن رَّسُولَ اللَّهِ وَخَاتَمَ النَّبِيِّينَ وَكَانَ اللَّهُ بِكُلِّ شَيْءٍ عَلِيمًا

“Muhamedi nuk është babai i askujt prej burrave tuaj, por është i dërguari i Allahut dhe vula e profetëve; Allahu është i Gjithë-dijshëm për çdo gjë.” 6

Nuk ka profet pas tij (salAllahu alejhi ue selem). Kushdo që thotë ndryshe është gënjeshtarë dhe renegat që ka braktisur Islamin.


1 En-Nahl 16:36

2 El-Enbija’ 21:25

3 An-Nisa’ 4:163

4 An-Nisa’ 4:163

5 Buhariu (7510) dhe Muslimi (193)

6 El-Ahzab 33:40

Shpërndaje:

Dela på facebook
Dela på whatsapp
Dela på telegram