Imam Abdul-Adhim bin Abdil-Kaui el-Mundhiri
Burimi: et-Targhib uet-Tarhib (2/115-116)
Dar Ihja et-Turath el-Arabi, 1388/1968
Përktheu: Valdet Gashi
www.perlatmuslimane.com
1 – Ebu Katadeh (radijAllahu anhu) ka treguar se i dërguari i Allahut ﷺ është pyetur rreth agjërimit të ditës së Ashures dhe ai tha:
”Ajo fshin mëkatet e vitit të kaluar.”
Muslimi.
2 – Ibn Abbasi (radijAllahu anhu) transmeton se i dërguari i Allahut ﷺ agjëronte ditën e Ashures dhe urdhëroi sahabet që ta agjërojnë atë ditë. Bukhari dhe Muslimi.
3 – Ibn Abbasi (radijAllahu anhu ) gjithashtu ka thënë:
”Unë nuk di që i dërguari i Allahut ﷺ të ketë agjëruar ndonjë një ditë për të kërkuar mirësinë e saj përveç kësaj dite.”
Transmeton Muslimi.
4 – Ibn Abbasi (radijAllahu anhu) gjithashtu ka thënë:
”Profeti ﷺ nuk është dhënë pas mirësive të ndonjë dite të veçantë pas agjërimit të Ramazanit përveç ditës së Ashures.” Transmeton Tabarani në ”el-Ausat” me zinxhir të mirë.
5 – Ai (radijAllahu anhu) gjithashtu ka thënë se i dërguari i Allahut ﷺ ka thënë:
”Nuk ka asnjë ditë që është më e mirë për ta agjëruar përveç muajit të Ramazanit dhe ditës së Ashures.”
Transmeton Tabarani në ”el-Kebir” dhe el-Bejhaki.
6 – Ebu Seid El-Khudri (radijAllahu anhu) na ka treguar se i dërguari i Allahut ﷺ ka thënë:
”Ai që agjëron ditën e Arafatit do t’i falen mëkatet e tij të vitit të kaluar dhe po ashtu të vitit të ardhshëm. Ai që agjëron ditën e Ashures do t’i falen mëkatet për një vit.” Transmeton Tabarani me zinxhir të mirë.
7 – Ebu Hurejra (radijAllahu anhu) ka treguar se i dërguari i Allahut ﷺ ka thënë:
”Ai i cili furnizon shtëpinë dhe familjen e tij në ditën e Ashures, Allahu do ta furnizojë për pjesën tjetër të vitit.”
Transmeton Bejhaki nga shumë transmetues prej sahabëve dhe shumë të tjerë prej tyre.
Ndërsa Bejhaki ka thënë: ”Edhe nëse këta zinxhirë janë të dobët, ata forcohen kur bashkohen njëri me tjetrin; Allahu e di më mirë.”