Autor: Shejkhul Islam Ibnu Tejmijeh (v. 728)
Shpjegues i librit: Imam Abdul-Aziz bin Abdil-lah bin Baz (v. 1420)
Burimi: Sherh el-Akidah el-Uasitijeh, fq. 17-19
Përktheu: Valdet Gashi
www.perlatmuslimane.com
Shtrembërim (tahrif) do të thotë ndryshim i fjalëve duke shtuar ose mangësuar.
Mohim (tatil) do të thotë që cilësitë e Allahut të mohohen apo të keqinterpretohen, apo që kuptimi i tyre të keqinterpretohet.
Pa hyrë në mënyrën (tekjif) do të thotë kur thuhet se ngritja e Allahut mbi arsh është në këtë mënyrë, apo zbritja e Tij është në këtë mënyrë, zemërimi i Tij në këtë mënyrë. Jo. Ehl-us-Sunneti nuk hyjnë në mënyrën e cilësive të Tij.
Krahasim (temthil) do të thotë që për shembull të krahasohet zemërimi i Allahut, ngritja, dëgjimi dhe shikimi me diçka tjetër.
Ehl-us-Sunneti konfirmojnë cilësitë dhe emrat e Allahut në një mënyrë që i përket Atij. Ata nuk ndryshojnë, ata nuk shtrembërojnë, ata nuk krahasojnë, ata nuk mohojnë, nuk imagjinojnë. Parimi i tyre është:
لَيْسَ كَمِثْلِهِ شَيْءٌ ۖ وَهُوَ السَّمِيعُ الْبَصِيرُ
“Asgjë nuk i përngjason Atij dhe Ai është Gjithëdëgjuesi, Gjithëshikuesi.” 1
Kur Imam Maliku (rahimehullah) dhe të tjerët nga selefët u pyetën në lidhje me këtë ai tha:
“Ngritja është e njohur. Mënyra se si është e panjohur. Është e detyrueshme që të besohet në të. Është bidat të pyesësh në lidhje me të.”
Ai (subhanehu ue te ala) është përshkruar me cilësitë e Tij, sikurse Ai i ka përmendur ato pa shtuar ose mangësuar. Ato cilësi janë reale. Ngritja është e vërtetë. Dëgjimi është i vërtetë. Kënaqësia është e vërtetë. Zemërimi është i vërtetë. Ato nuk janë metaforike. Ato janë reale dhe i përshtaten vetëm Allahut.
Ne nuk imagjinojmë, ne nuk krahasojmë, ne nuk ngjasojmë, ne nuk shtrembërojmë. Ne e kuptojmë çdo gjë që është përmendur në Kuran dhe sunnet fjalë për fjalë.
Selefët thanë:
“Kumtojini ato (cilësitë) siç kanë ardhur.”
Do të thotë pa shtrembërim, pa mohim apo pa keqinterpretim. Ne i kumtojmë ato dhe besojmë se ato janë të vërteta, se ato janë cilësitë e konfirmuara të Allahut dhe se Allahu është përshkruar me të vërtetë me to, pa përngjasim, pa krahasimin, pa imagjinim ose mohim. Kështu thonë Ehl-us-Sunneti dhe Xhemati.
1 Esh-Shura 42:11