Imam Muhamed Nasirudin El-Albani (v. 1420)
Sifatu Salat-in-Nebi, fq. 85-86
Përktheu: Valdet Gashi
Profeti ﷺ e madhëronte suren El-Fatihah. Ai thoshte:
”Ai që nuk e lexon hyrjen e librit (el-Fatihan) nuk ka namaz.”1
Në një tjetër formulim thotë:
”Namazi nuk është i vlefshëm nëse njeriu nuk e lexon El-Fatihan në të.”2
Ndonjëherë, profeti ﷺ thoshte:
”Një namaz pa leximin e El-Fatihas është i mangët, i mangët, i mangët. Ai namaz nuk është i plotë.”3
Profeti ﷺ ka thënë:
”Allahu -tebarek ue te ala- ka thënë: ”E kam ndarë namazin4 midis Meje dhe robit Tim në dy pjesë. Një pjesë është për Mua dhe një pjesë për robin Tim – dhe robit tim i jepet ajo që ai kërkon.”
I dërguari i Allahut ﷺ ka thënë: ”Kur robi thotë:
”Çdo lavdërim i përket Allahut, Zotit të botëve!”5
Allahu -te ala- thotë: ”Robi im më ka bërë hamd Mua.”
Kur robi thotë:
”Të Gjithëmëshirshmit, Mëshirëplotit!”6
Allahu thotë: ”Robi im më ka lavdëruar Mua.”
Kur robi thotë:
”Sunduesit të ditës së gjykimit!”7
Allahu -te ala- thotë: ”Robi im më ka madhëruar Mua.”
Kur robi thotë:
”Vetëm Ty të adhurojmë dhe vetëm prej Teje ndihmë kërkojmë.”8
Allahu thotë: ”Kjo është mes Meje dhe robit Tim – dhe robit Tim i jepet ajo që ka kërkuar.”
Kur robi thotë:
”Udhëzona (përforcona) në rrugën e drejtë! Në rrugën e atyre, të cilët i begatove me të mira, jo në të atyre që kundër veti tërhoqën hidhërimin, e as në të atyre që e humbën veten!”9
Allahu thotë: ”Këto janë për robin Tim- dhe robit i jepet ajo që ai kërkon.”10
Profeti ﷺ ka thënë:
”Allahu nuk ka shpallur Teurat dhe Ungjill asgjë të ngjashme sikurse baza e Kuranit (El-Fatihah) të cilat janë këto shtatë ajetet që përsëriten11 [dhe Kurani madhështor i cili më është dhënë mua].”12
Ai ﷺ e urdhëroi personin që u fal gabim që të lexojë suren El-Fatihah në namazin e tij13 dhe i tha personit që nuk kishte mundësi që ta mësojë atë përmendësh që të lexoj:
سبحان الله و الحمد لله ولا إله إلا الله والله أكبر ولا حول ولا قوة إلا بالله
”Hamdi dhe lavdërimi i takon Allahut. I pa të meta është Allahu. Nuk ka të adhuruar tjetër me të drejtë përveç Allahut. Allahu është më i Madhi. Nuk ka asnjë lëvizje apo forcë përveç nga Allahu.”14
Ai ﷺ i tha personit që u fal gabim:
”Nëse mund të lexosh Kuranin bëje këtë. Përndryshe, duhet të thuash: “ElhamduliLah”, “Allahu Ekber” dhe “La ilahe ilAllah.”15
1 Bukhari, Muslimi, Ebu Auaneh dhe Bejhaki. Hadithi përmendet në “El-Irua (302)”.
2 Darakutni i cili e shpalli hadithin autentik dhe Ibn Hibani në ”Es-Sahih”. Hadithi përmendet në referencën e kaluar.
3 Muslimi dhe Ebu Auaneh.
4 Do të thotë El-Fatihah.
5 1:2.
6 1:3.
7 1:4.
8 1:5.
9 1:6-7.
10 Muslimi, Ebu Auaneh dhe Maliku. Hadithi ka transmetime dëshumes tek Es-Sehmi në ”Tarikh Xhurxhan (144)” nga Xhabiri.
11 El-Baxhi ka thënë:
Ai kishte për qëllim fjalët e Allahut -te ala-:
”Na të kemi dhënë ty shtatë (ajetet) që shpesh përsëriten dhe Kuranin madhështor.” 15:87.
Ato quhen ”shtatë” sepse ato janë shtatë ajete dhe ”që shpesh përsëriten”, sepse ato përsëriten në çdo rekat. Ato quhen ”Kuranin madhështor” për tu dalluar pasi që i tërë Kurani është i madhërishëm. Gjithashtu qabja quhet ”Shtëpia e Allahut”, edhe pse të gjitha xhamitë janë shtëpi të Allahut. Thuhet kështu nga dallueshmëria dhe nderimi.”
12 Nesai dhe Hakimi i cili e shpalli autentik dhe Dhehebi u pajtua më të.
13 Bukhariu në “El-Kira’ah Khalf El-Imam” me një zinxhir të mirë transmetimi.
14 Ebu Daudi, Ibn Khuzejmeh (1/80/2), Hakimi, Tabarani dhe Ibn Hibani të cilët e shpallën autentik dhe Dhehebi u pajtua me ta.
15 Ebu Daudi dhe Tirmidhi i cili thotë se hadithi është i mirë. Zinxhiri i tij i transmetimit është i mirë. Shih “Sahih Ebi Daud (807)”.