Autori i librit: Hafidh Ibn Haxher el-Askalani
Shpjegues: Imam Muhamed bin Salih bin Uthejmin (v. 1421)
Esh-Sherh El-Mukhtasar Ala Bulugh-il-Maram
Përktheu: Valdet Gashi
www.perlatmuslimane.com
15 – Ibn Umeri -radijAllahu anhuma- rrëfeu se i dërguari i Allahut ﷺ ka thënë:
“Na janë lejuar dy lloje gjaku dhe dy lloje kafshësh të ngordhura. Dy llojet e kafshëve të ngordhura janë peshqit dhe karkalecat, ndërsa dy llojet e gjakut janë gjaku i mëlçisë dhe ai i shpretkës.”
Transmetojnë Ahmedi (5723) dhe Ibn Maxheh (3314), dhe hadithi përmban dobësi.
Shpjegimi:
Autori -rahimehullah- ka përmendur hadithin e Ibn Umerit -radijAllahu anhuma- i cili rrëfeu se profeti ﷺ ka thënë:
“Na janë lejuar dy lloje gjaku dhe dy lloje kafshësh të ngordhura.”
Kjo do të thotë se Allahu na i ka lejuar ato. Pastaj profeti i sqaroi këto gjëra të lejuara dhe tha:
“Dy llojet e kafshëve të ngordhura janë peshqit dhe karkalecat, ndërsa dy llojet e gjakut janë gjaku i mëlçisë dhe ai i shpretkës.”
Por autori ka theksuar se hadithi ka dobësi. Kjo është e saktë sa i përket atribimit të këtyre fjalëve profetit ﷺ, por këto fjalë janë transmetuar në mënyrë autentike nga një sahabi. Është vërtetuar se edhe vetë Abdullah bin Umeri -radijAllahu anhuma- i ka thënë këto fjalë.
Kur një sahabi thotë se diçka “na është lejuar”, kjo ka të njëjtin gjykim sikur ta ketë thënë profeti ﷺ sepse vetëm Allahu dhe i dërguari i Tij kanë të drejtë të lejojnë ose të ndalojnë. Prandaj kur një sahabi thotë se diçka është lejuar për ne, ai ka për qëllim se këtë e ka lejuar i dërguari i Allahut ﷺ.