Imam Muhamed Nasir-ud-Din el-Albani (v. 1420)
Edeb-uz-Zifaf
Përktheu: Valdet Gashi
www.perlatmuslimane.com
Në hadithin e transmetuar nga Ebu Talhah -radijAllahu anhu- thuhet:
“Vërtet engjëjt nuk hynë në një shtëpi që ka figurë përveç nëse janë të vizatuara në rroba.”
Do të thotë përveç figurave të krijesave që janë në rroba të cilat janë të papërfillshme e nuk janë të varura nëpër mure, gjë të cilën e sqaron hadithi i Aishes ku tregon qartë se engjëjt nuk hyjnë në një shtëpi ku ka figura të krijesave të varura në mure ndryshe nga rasti kur këto figura janë të papërfillshme, e jo të varura.
”…e pashë të dërguarin e Allahut ﷺ të mbështetur në njërin prej jastëkëve e në të kishte figura (të grisura).”
Pra në këtë rast engjëjt nuk pengohen nga hyrja në shtëpi. Hadithi i transmetuar nga Aishah sqaron dhe specifikon hadithin e transmetuar nga Ebu Talhah, prandaj nuk lejohet të pasohet gjykimi sipas hadithit të transmetuar nga Ebu Talhah siç ka bërë autori i librit në fjalë. Përveç kësaj ai gaboi për herë të dytë kur u argumentua me këtë hadith (të transmetuar nga Ebu Talhah) se lejohet të bësh figura të krijesave në rroba dhe po ashtu bazuar mbi këtë, ai tha se lejohen dhe vizatimet në letra. Ky është gabim i rëndë. Hadithi lejon vetëm atë që sapo kemi sqaruar. Ky hadith (i transmetuar nga Ebu Talhah) nuk tregon fare lejueshmërinë e bërjes së figurave të krijesave pasi që hadithi i transmetuar nga Aishah ndalon në mënyrë të qartë imazhet e krijesave nëpër rroba pasi që profeti ﷺ ka thënë:
“Vërtet ata që i bëjnë këto figura do të ndëshkohen në ditën e gjykimit.”
Nuk lejohet ta braktisim dispozitën e këtij hadithi të qartë për hadithin e transmetuar nga Ebu Talhah, kjo është diçka e qartë për çdo njeri të mençur, in shaa Allah.
Me këtë që u tha nuk lejohet blerja e rrobave në të cilat ka figura të tilla edhe nëse qëllimi është që ato të përdoren për gjëra të papërfillshme sepse blerje të tilla përfshijnë bashkëpunimin në mëkat. Ai që blen rroba në të cilat gjenden të tilla figura, nëse nuk ka dituri për ndalesën që ekziston për to, mund të mendojë se rrobat e tilla lejohen për gjëra të papërfillshme siç tregohet edhe në hadithin e transmetuar nga Aishah ku thuhet:
”…e pashë të dërguarin e Allahut ﷺ të mbështetur në njërin prej jastëkëve e në të kishte figura (të grisura).”
Ndoshta figurat u prenë në mes saqë kur ato u grisën humbën pamjen e mëparshme, atë të kuajve dhe në këtë mënyrë, el-Hafidh Ibn Haxheri bëri bashkimin e haditheve siç e kemi përmendur në temën nr 33.
Pastaj kam gjetur një transmetim që e përforcon këtë mënyrë argumentimi e që është transmetimi nga Ebu Hurejra në hadithin ku Xhibrili i thotë të dërguarit të Allahut ﷺ:
”Vërtet në shtëpi është një perde në mur që ka figura. Këputjani kokat atyre dhe bëni ato shtrojë ose jastëk sepse ne nuk hyjmë në ato shtëpi ku ka figura.”
Transmetuesit e këtij hadithi janë prej transmetuesve të saktë siç e kam sqaruar në “Silsilat-ul-Ahadith es-Sahihah”.