Autor: Imam Abdurr-Rrahman es-Sa’di (v. 1376)
Shpjegues i librit: Alameh Ahmed bin Jahja en Nexhmi (v. 1429)
Burimi: Fet’h Rabb-il-Berijjat ala Kitab Ahamm-il-Muhimmat, fq. 33
Përktheu: Valdet Gashi
www.perlatmuslimane.com
Imam Abdurr-Rrahman es-Sa’di ka thënë:
Pyetja e pestë: Çka mendoni për mëshirën, zbritjen e Allahut në qiellin më të ulët dhe të ngjashme?
Përgjigje: Ne besojmë dhe pranojmë çdo gjë me të cilën Allahu e ka përshkruar veten e Tij sikurse mëshirën, kënaqësinë, zbritjen dhe ardhjen. E njëjta gjë vlen edhe për çdo gjë me të cilën e ka përshkruar Atë i dërguari ﷺ. Kjo duhet të bëhet në një mënyrë që nuk i përngjason ndonjë prej krijesave sepse asgjë nuk është si Ai.
Në të njëjtën mënyrë sikurse Allahu ka një esencë që është ndryshe nga esencat e të tjerëve, Ai gjithashtu ka cilësi që nuk janë të ngjashme në cilësitë e të tjerëve.
Kjo dëshmohet nga sqarimet madhështore në Kuran dhe sunnet të cilat vërtetojnë ato cilësi, dhe me të cilat lavdërohet Allahu. Aty shpjegohet se Allahu gjithashtu është i pastër nga të qenurit i barabartë me Të, apo që dikush të jetë i njëjtë me Të, apo që Ai të ketë ndonjë ndihmës.
Shpjegimi
Allahu e ka përshkruar veten me mëshirë dhe e ka emëruar veten me emrat e Er-Rrahman (Mëshiruesi) dhe Er-Rrahim (Mëshirbërësi). Ai na ka njoftuar se Ai ka njëqind mëshira njëra prej të cilave është dërguar në tokë për njerëzit që ta përdorin me njëri-tjetrin. Me atë mëshirë kafsha kujdeset që të mos e shkel fëmijën e saj. Nëntëdhjetë e nëntë mëshirat e tjera janë tek Ai; Ai i fal robërit e Tij besimtarë me të në ditën e gjykimit.
Nuk lejohet të shtrembërohet mëshira, të cilën e bëjnë Esharitë. Ne besojmë se cilësitë e Allahut nuk janë të ngjashme me cilësitë e krijimit.
Përveç kësaj, ne besojmë se Allahu (azze ue xhel) zbret çdo natë deri në qiellin e fundit kur një e treta e fundit e natës mbetet dhe thotë:
”Kush më lutet që Unë t’i përgjigjem? Kush kërkon nga Unë që t’i jap atij? Kush kërkon nga Unë falje që ta fal atë?” 1
Ne gjithashtu besojmë se Allahu zbret në qiellin më të ulët në pasditen në ditën e Arafatit.
Nëse themi se Allahu zbret në qiellin më të ulët, kemi për qëllim se zbritja e Tij i përshtatet vetëm madhështisë së Tij. Nuk lejohet të pyetet nëse Ai e braktis arshin apo jo. Kjo është diçka që i përshtatet cilësive të krijimit. Allahu e përshkruan veten e Tij kur thotë:
لَيْسَ كَمِثْلِهِ شَيْءٌ وَهُوَ السَّمِيعُ البَصِيرُ
“Asgjë nuk i shëmbëllen Atij dhe Ai është Gjithëdëgjuesi, Gjithëshikuesi.”2
Ashtu sikurse esenca e Allahut nuk i ngjan esencës së krijimit, as cilësitë e Tij nuk i ngjajnë cilësive të krijimit.
Autori (rahimehullah) ka thënë: Kjo dëshmohet nga sqarimet madhështore në Kuran dhe sunnet të cilat vërtetojnë ato cilësi, dhe me të cilat lavdërohet Allahu. Aty shpjegohet se Allahu gjithashtu është i pastër nga të qenurit i barabartë me Të, apo që dikush të jetë i njëjtë me Të, apo që Ai të ketë ndonjë ndihmës.”
Kjo do të thotë që Allahu (azze ue xhel) e ka pastruar veten nga të qenurit i barabartë dhe ka thënë:
لَيْسَ كَمِثْلِهِ شَيْءٌ وَهُوَ السَّمِيعُ البَصِيرُ
“Asgjë nuk i shëmbëllen Atij dhe Ai është Gjithëdëgjuesi, Gjithëshikuesi.”
Ai (subhaneh) gjithashtu nuk ka të barabartë me Të. Nuk ka asnjë që mund t’i ngjajë Atij:
وَلَمْ يَكُن لَّهُ كُفُوًا أَحَدٌ
“Dhe askush nuk është i barabartë (as i krahasueshëm) me Atë!”3
Allahu (subhanehu ue te ala) gjithashtu ka thënë se Ai nuk ka ndihmës në sovranitetin e Tij:
ذَلِكُمُ اللَّهُ رَبُّكُمْ لَهُ الْمُلْكُ وَالَّذِينَ تَدْعُونَ مِن دُونِهِ مَا يَمْلِكُونَ مِن قِطْمِيرٍ
“I tillë është Allahu, Zoti juaj. I Tij është mbizotërimi. E ata të cilët ju i lutni e u thërrisni në vend të Tij, nuk kanë asnjë grimë fuqi (kitmir – lëvozhgë e hollë që mbështjell farën e hurmës).”4
Ai ka thënë se ata madje kanë mungesë të pushtetit mbi lëvozhgën e hurmës
E gjithë kjo konfirmon cilësitë e Allahut (azze ue xhel), e pastron Atë nga cilësitë e krijimit dhe e veçon Atë me cilësitë hyjnore të veçanta për Të.
1 Muslimi (758).
2 42:11.
3 112:4.
4 35:13.